Mr. Bo9agr

Life Isn't That Serious

Tuesday, June 20, 2006

Fire in Hawalli

اندلع حريق في إحدى العمارات المهجورة في منطقة حولي خلف شارع ابن خلدون ، ولم يصب أحد بأذى سوى بعض الخسائر البسيطة في الممتلكات ، إذ أن العمارة كانت مهجورة وسيتم هدمها لاحقا ضمن مشاريع التوسع في المنطقة ، يذكر أن سكان العمارات المحيطة تجمهروا لمشاهدة الحريق في العمارة الآيلة للسقوط ولمشاهدة عملية إطفاء الحريق ، وفيما يلي صور الحريق من عدة زوايا
إضغط لتكبير الصورة
بداية الحريق من ملحق العمارة المهجورة
إضغط لتكبير الصورة
وصول سيارات الإطفاء
إضغط لتكبير الصورة
اشتعال النار في مدخل وجانب العمارة
إضغط لتكبير الصورة
رجل الإطفاء يقوم بواجبه
إضغط لتكبير الصورة
المشهد بعد إطفاء النار

Saturday, June 10, 2006

entekhabat

انتخابات ؟؟ أي انتخابات ؟؟
أقوم هذه الأيام بعمل جولات إنتخابية في بعض المناطق لمشاهدة آخر تطورات حرب الشوارع والمظاهر غير الحضارية التي سببها المرشحون الأفاضل ، سأسرد بعض مشاهداتي وأعتذر عن إدراج أي صور ( مع أني مصور وايد ) لسببين : 1 مالي خلق 2 البلوق مو ناقص متروس صور
اللوحات الكبيرة بو مترين أو ثلاثة ومثبتة بأوتاد وسيام وحبال وحديد وأكياس رمل ، حشى خندق مو لوحة ، طيب حاطين أكياس رمل قلنا أوكي عشان لا يخربون الرصيف بالأوتاد ، لكن أنهم يحكون لوحة شكبرها على الزرع اللي بنص الدوار ويخربون الثيل لا .. هالمرشح وين والبيئة وين والنظافة وين
أستغرب من بعض المرشحين اللي يترسون الشارع لوحات صغيرة فيها اسمهم بس ويكررونها 600 مرة كل 10 أمتار !! هذي سببها واحد من اثنين : فلوسه زايدة ، أو الهندي اللي يعلقهم بالمنطقة ماله خلق
تخريب لوحات المرشحين المنافسين يدل على قلة الأدب ويدل ضعف الشخصية ، المرشح مو عاجبك روح ناقشه بالمقر ، أكتب عنه بالجريدة ، دز له مسج ، كلمه ، مو تكسر لوحاته الخشب وتشق لوحاته القماش
شراء الأصوات ؟؟ أحد بهالتفاهة والسخافة يعطي فلوس حق واحد ويقوله أحلف أنك تصوت لي ؟؟!!!
من وجهة نظري أن النائب اللي يسوي جذي مستخف بعقول الناس ، والناخب اللي ياخذ فلوس ويصوت حق هالمرشح ماعنده سالفة وعقله صغير ، إما أن تأخذ الفلوس وما تصوت له ، أو ما تاخذ الفلوس وتصوت حق اللي تبي ، سواء أهو أو غيره ، لأنه ماكو ضمان للمرشح أنك صوت له ، فخله يعيش بالوهم ويصدق نفسه أن عنده أصوات وأنت معطيه بو اللابس
أتمنى من البلدية معاقبة من يترك لوحاته تسد الطرق أو تحجب النظر عند التقاطعات والمداخل والمخارج سواء فاز أم لم يفز ، لأن البعض خربها صراحة ، توقف عند مخرج أو لفة فوق تحت وتفاجأ بلوحة مترين بثلاثة تحجب الرؤية ، ماتقدر تشوف السيارات القادمة وتسبب لك حادث محترم
بصراحة حاولت أكون متفائل خير بنوابنا وانتخاباتنا لكن الوضع أقشر ، تشوف لك نائب محترم طموح عنده برنامج كامل مطبوع والرجل ذكي وفطين وصاحب رؤية وهدف ومؤهلات بس .. ما ينجح .. بالمقابل صاحب شهادة متواضعة وعمل مراقب في أحد الموانئ لمدة 200 سنة ( وهذه كل مؤهلاته ) ينجح بالمركز الأول وبفارق أصوات كبير .. والسبب .. ( الـفلاني ) في نهاية الاسم !! والناس عمياني تصوت له .. آخ يا قلبي يوم شفت نتائج انتخابات البلدي ..طاحت المهندسة وطاح المهندس ونجح فلان الفلاني .. لا ومستانسين حاطين صور العجايز ببراقعهن رايحين يصوتون له .. والله لو تسألها منو هذا اللي بتصوتين له ؟ ليش ؟ شعنده ؟ حق شنو ؟ ما تدري عن هوا دارها .. بس قالولها ترى فلان نازل وبناخذج تصوتين .. على طول راحت ..
واشدعوة الحريم مقصرين ؟؟ إذا أصواتهم حق المرشحين الرجال أكثر !!
أستبعد وبشدة فوز أي مرشحة في هذه الانتخابات ولا الانتخابات اللي تليها لأن شعوبنا العربية والخليجية خاصة لازالت منغلقة على نفسها وتعيش بمفهوم أن المرأة للبيت فقط ، وأستبعد أيضا حصول أي مرشحة على الصوت الأول في أي ورقة ترشيح من رجل ، وما علينا إلا الانتظار .. وياخبر اليوم بفلوس .. بكره ببلاش



hits